45ارب روپیہ ریاستی بجٹ سے آزادکشمیر کو پاکستان سے ملا نے والی سڑکوں کی تعمیر پر خرچ کیا گیا۔وزیر اعظم راجہ فاروق حیدر
No image مظفرآباد ۔وزیراعظم آزادجموںوکشمیر راجہ محمدفاروق حیدر خان نے کہا ہے کہ گزشتہ ساڑھے چار سالوں میں 45ارب روپیہ ریاستی بجٹ سے آزادکشمیر کو پاکستان سے ملا نے والی بین اضلاعی سڑکوں کی تعمیر پر خرچ کیا گیا سڑکوں کی تعمیر کا معیار بہتر بنایا گیا ان کو بہترین حالت میں بحال رکھنے اور ضروری مرمت و دیکھ بحال کے لیے کشمیر ہائی وے اتھارٹی کا ادارہ فعال بنایا جا رہا ہے۔ سڑکوں پر اورلوڈنگ کے خاتمے کے لیے تمام انٹری پوانٹس پر ویٹ سٹیشن قائم کیے جا رہے ہیں آزادکشمیر کے اندر ہر ضلع کو دوسرے ضلع سے ملانے اور پاکستان کے ساتھ ملنے والی سڑکوں کے ساتھ ساتھ اندرون آزادکشمیر بھی اہمیت والی تمام سڑکوں کی تعمیر کی گئی ان کی دیکھ بھال ضروری ہے۔
وزیر اعظم راجہ فاروق حیدر کی زیر صدارت پبلک پرائیویٹ پارٹنر شپ کی سٹیرنگ کمیٹی کے اجلاس میں وزیر خزانہ ڈاکٹر محمد نجیب خان ،وزیر تعمیرات عامہ چوہدری محمد عزیز ،ایڈیشنل چیف سیکرٹری ترقیات ڈاکٹر آصف حسین شاہ ،پرنسپل سیکرٹری ،سیکرٹریز صاحبان و دیگر اعلی حکام شریک تھے ۔اجلاس میں مختلف تجاویز کا بھی جائزہ لیا گیا۔
وزیراعظم آزادکشمیر نے ہدایت کی کہ محکمہ تعمیرات عامہ اس حوالے سے ایک مستقل اور پائیدار ورکنگ پلان تیار کرے۔ابتدائی طور پر تمام انٹری پوانٹس پر ویٹ سٹیشنز کی تعمیر کے لیے حکومت نے اپنے بجٹ میں رقم مختص کی ہے جس کے بعد ویٹ سٹیشنز اور ٹول ٹیکس کا نظام فعال بنانے کے لیے تجاویز لائی جائیں ۔آزادکشمیر میں ساڑھے چار سالوں میں ہونے والی تعمیر و ترقی کا موازنہ کسی بھی حکومت سے کر کے دیکھ لیں ترقیاتی کاموں کا معیاربھی پہلے سے بہت بہتر ہوا ہے اب اس اثاثے کی حفاظت اور اسے زیادہ عرصے تک قابل استعمال بنانے کے لیے اقدامات اٹھائے جا رہے ہیں ۔آزادکشمیر کے اندر سڑکوں کی تعمیر پر ایک سال میں جتنا بجٹ خرچ ہوتا ہے اتنا کل ترقیاتی بجٹ ہوتا تھا آزادکشمیر کے وسائل میں اضافے اور دیرینہ مسائل کے حل کے لیے قائد پاکستان مسلم لیگ ن محمد نواز شریف کے احسانات کبھی نہیں بھولیں گے جنہوں نے ترقیاتی بجٹ دوگنا کیا اور اس میں اضافہ بھی کیا موجودہ حکومت کے بھی شکر گزار ہیں کہ اس نے اس میں کمی نہیں کی شاہرات کے بعد اب سیاحت و پیداواری شعبہ پر ایک منظم پالیسی کے تحت ترقیاتی بجٹ خرچ کیا جائے گا ۔
دریں اثناوزیر اعظم آزادکشمیر راجہ محمد فاروق حیدر خان کی زیر صدارت محکمہ برقیات کا اعلی سطحی اجلاس منعقد ہوا جس میں محکمہ برقیات کے ٹیرف اور ری سٹریکچرنگ کے حوالے سے مختلف تجاویز زیر غور لائی گئیں ۔واٹر یوز ج چارجز اور رعایتی نرخوں پر بجلی کی فراہمی اور ڈسٹری بیوشن نیٹ ورکس کے حوالے سے بھی مختلف تجاویز کا جائزہ لیا گیا اجلاس میں وزیر خزانہ ڈاکٹر محمد نجیب نقی خان ،ایڈیشنل چیف سیکرٹری ترقیات ڈاکٹر آصف حسین شاہ ،پرنسپل سیکرٹری ،سیکرٹری خزانہ ،سیکرٹری برقیات ،چیف انجینئر برقیات و دیگر نے شرکت کی ۔




واپس کریں