مسئلہ کشمیر کا حل اقوام متحدہ کی قرار دادیں ہیں،وزیر اعظم راجہ فاروق حیدر خان کی زیر صدارت آزاد جموں وکشمیر کابینہ اجلاس میں متفقہ منظور قرار دادیں
No image مظفر آباد۔آزادجموں وکشمیر کابینہ کا اجلاس منگل کے روز وزیر اعظم راجہ محمد فاروق حیدر خان کی زیر صدارت منعقد ہوا۔ اجلاس میں متعدد قرار دادیں متفقہ طور پر منظور کی گئیں۔جن میں کہا گیا کہ آزادجموں وکشمیر کابینہ کا یہ اجلاس سیز فائر لائن باالخصوص وادی نیلم،حویلی،پونچھ سیکٹر اور سما ہنی میں ہندوستانی فوج کی جانب سے نہتے اور بے گناہ کشمیریوں پر گولہ باری اور فائرنگ کی شدید مذمت کرتا ہے۔ ہندوستان کا یہ حملہ اس کی مقبوضہ کشمیر میں ذلت آمیز شکست اور ناکامی کو آشکار کرتا ہے۔ اجلاس سمجھتا ہے کہ یہ قربانیاں تحریک آزادی کا وہ اثاثہ ہیں جو آگے چل کر ہندوستان کی تباہی و شکست کا باعث بننے کے ساتھ ساتھ کشمیریوں کی ابدی آزادی کا بھی وسیلہ بنیں گی۔اجلاس ہندوستانی جارحیت کا منہ توڑ جواب دینے پرافواج پاکستان کو سلام پیش کرتے ہوئے ہندوستانی فائرنگ اور گولہ باری سے شہید ہونے والوں کو بھی خراج عقیدت اورمتاثرین سے اظہار ہمدردی کرتا ہے۔دوران گولہ باری گورنمنٹ گرلز مڈل سکول لالہ کے بچوں اور اساتذہ کی جان بچاتے ہوئے شہید ہونے والے شہری دفاع کے پوسٹ وارڈن راناپرویزاحمد کو خراج عقیدت پیش کر تا ہے۔اجلاس پشاور ہائیکورٹ کے چیف جسٹس وقاراحمد سیٹھ کی عدلیہ کے لیے گراں قدر خدمات کو خراج عقیدت پیش کرتا ہے۔ان کی عدلیہ کے لیے خدمات کو مدتوں یاد رکھا جائے گا۔ اجلاس کرونا وائرس کے باعث فوت ہونے والے ڈاکٹر رضوان عابد، ڈاکٹر سردار حلیم،ڈاکٹر صادق، اور جیو نیوز کے نمائندہ ارشد وحید چوہدری کی وفات پر رنج و غم کا اظہار کرتے ہوئے ان کی خدمات کو بھی خراج عقیدت پیش کرتا ہے۔اجلاس سیز فائر لائن کے متاثرین کو فوری معاوضہ جات، بروقت امداد کی فراہمی اور بالخصوص شہدا کے لواحقین کیلئے تین ہزار روپے فی کس وظیفہ دینے کے فیصلہ پر وزیر اعظم راجہ محمد فاروق حیدرخان کو خراج تحسین پیش کرتا ہے۔ اجلاس ہندوستان کی خفیہ ایجنسی را کی طرف سے پاکستان کے اندردہشتگردی کے لیے دہشتگرد گروہوں کو فنڈنگ اور یہاں عدم استحکام پیدا کرنے کی کوششوں کی بھی مذمت کرتے ہوئے واضح کرتا ہے کہ افواج پاکستان کے ساتھ ملکر کشمیری و پاکستانی عوام دشمن کی ہر سازش کو ناکام بنائیں گے۔ اجلاس ربیع الاول کے بابرکت اور مبارک ماہ کے موقع پر تمام اہل اسلام کو مبارکباد پیش کرتا ہے۔ آپۖدو جہانوں کے لیے باعث رحمت ہیں۔ اللہ تعالی آپ ۖ کے صدقے مسلمانوں کے دکھ درد اور مصائب کم کرے اور کشمیر ی مسلمانوں کوآزادی کی نعمت سے سرفراز فرمائے۔ اجلاس آزادکشمیر میں جاری ترقیاتی عمل پر اطمینان کا اظہار کرتے ہوئے اس کا کریڈیٹ راجہ محمد فاروق حیدرخان کی ویژنری قیادت کو دیتا ہے جن کی بھرپور سرپرستی اور رہنمائی میں ریاست کی خوشحالی کا سفر جاری ہے۔ اجلاس مقبوضہ کشمیر میں جاری ہندوستانی فوجی محاصرے، انسانی حقوق کی بدترین پامالیوں، نافذ جملہ کالے قوانین، انٹرنیٹ کی بندش و معطلی، میڈیا اور این جی او ز پر پابندی پرگہری تشویش کا اظہار کرتے ہوئے اقوام متحدہ، انسانی حقوق کی عالمی تنظیموں، اوآئی سی، یورپی یونین سے بھارتی فوجی محاصرہ اور پابندیاں ختم کرانے کیلئے عملی کردار ادا کرنے کا مطالبہ کرتا ہے۔ اجلاس پاکستان کے اندر دہشتگردی کے حالیہ واقعات میں شہید ہونے والے افواج پاکستان کے جوانوں اور مدرسہ کے طلبہ کو بھی خراج عقید ت پیش کرتا ہے۔ اجلاس وزیر اعظم راجہ محمد فاروق حیدر خان کی قیادت پر اپنے مکمل اعتماد کا اظہار کرتے ہوئے ان کی قیادت میں آزاد خطہ کے عوام کی بے لوث خدمت جاری رکھنے کے عزم کا اعادہ کرتا ہے۔ اجلاس اس عزم کا اعادہ کرتا ہے کہ مسئلہ کشمیر کا حل صرف اور صرف اقوام متحدہ کی قراردادوں میں مضمر ہے جن پر دونوں اطراف کے کشمیری متفق ہیں اور یہی مسئلہ کا پائیدار اور مستقل حل ہو گا۔

واپس کریں