دل بعض و حسد سے رنجور نہ کر
یہ نور خدا ہے اس سے بے نور نہ کر
مظفرآباد( پی آئی ڈی)19اگست2022۔وزیراعظم آزادحکومت ریاست جموں وکشمیر سردار تنویر الیاس خان کا مہاجرین کے 100بچے بچیوں کو سرکاری ملازمت دینے ، مہاجر کیمپ امبور میں گزلزمڈل سکول کے قیام ،مہاجرین کے بچوں کی تعلیم و شادیوں کیلئے ڈیڑھ کروڑ روپے ، مہاجرین کیمپس کے باسیوں کو قرضوں کی فراہمی کیلئے3کروڑ روپے دینے کا اعلان ۔ مہاجرکیمپ امبور مظفرآباد میں مہاجرین گزارہ الانس میں فی کس 1500روپے ماہانہ اضافے کا نوٹیفکیشن مہاجرنمائندہ چوہدری فیروز الدین کو دینے کے بعد ایک بڑی تقریب سے خطاب کرتے ہوئے وزیراعظم سردار تنویر الیاس خان نے کہاکہ ایل او سی کے دوسری جانب رہنے والے مقبوضہ کشمیر کے عوام کو سلام پیش کرتا ہوں ۔ مہاجرین عظیم مقصد کی خاطر اپنا گھر بار چھوڑ کر یہاں آئے ، اپنے آبا اجداد کا علاقہ چھوڑنا آسان نہیں ، مہاجرین کے جذبے کوسلام پیش کرتا ہوں ،مہاجرین کی مشکلات کا احساس ہے ۔ مہاجرین کو ہم سہولیات نہ دے سکے جس پر ان سے معذرت خواہ بھی ہوں ۔انہوں نے کہاکہ میرے خلاف اگر کو ئی بات کرتا ہے تو وہ اسکا حق ہے ، آج مہاجرین کیلئے جن منصوبو ں اورفنڈز کا اعلان کیا وہ میرا فرض تھا ۔ مہاجرین کو تنہا نہیں چھوڑیں گے ،ملازمتوں میں مہاجر کوٹہ پر سوفیصدعملدرآمد یقینی بنایا جائے گا۔ انہیں پختہ گھروں کی تعمیر سمیت تمام سہولیات کی فراہمی یقینی بنائی جائیگی۔اس موقع پر وزراحکومت خواجہ فاروق احمد، دیوان علی خان چغتائی، چوہدری محمد رشید، پارلیمانی سیکرٹریز پروفیسر تقدیس گیلانی اور جاوید بٹ ، ممبراسمبلی دیوان غلام محی الدین ، سیکرٹری جنرل پی ٹی آئی آزادکشمیر راجہ منصور خان ، اظہر گیلانی ، کمشنر بحالیات چوہدری محمد فرید ودیگر بھی اس موقع پر موجودتھے ۔ وزیراعظم آزادکشمیر نے امبور مہاجر کیمپ کے لیے 80کنال قبرستان کیلئے جگہ مختص کرنے کی ہدایت کی ۔