اسلام آباد (کشیر رپورٹ) پاکستان کے کئی بار وزیر اعظم رہنے والے،پاکستان مسلم لیگ ن کے قائد میاں محمد نواز شریف نے کہا ٹوئٹر پہ اپنے ایک بیان میں کہا ہے کہ '' وزیر اعظم شہباز شریف کے بارے میں مجھ سے منسوب منفی تبصرے گمراہ کن اور غلط ہیں۔ مجھے امید ہے کہ انتہائی مشکل حالات میں ایس ایس کی مخلصانہ اور انتھک کوششیں ثمر آور ہوں گی اور وہ ملک کو عمران خان کی پیدا کردہ گندگی سے نکالیں گے۔''
نواز شریف نے یہ بیان اس تناظر میں دیا ہے کہ پاکستان کے ایک سنیئر صحافی سہیل وڑائچ نے محمد نواز شریف سے لندن میں ملاقات کے بعد کہا کہ نواز شریف نہ شہباز شریف کی کارکردگی سے مطمئن ہیں اور نہ ہی مفتاح اسماعیل کی کارکردگی سے، نواز شریف چاہتے ہیں کہ شہباز شریف اپنی پالیسیز کو ریویو کریں۔جیو نیوز کے پروگرام "آج شاہزیب خانزادہ کے ساتھ" میں گفتگو کرتے ہوئے سہیل وڑائچ نے کہا کہ نواز شریف یہ بیانیہ بنائیں گے کہ عدالتوں نے ان کے ساتھ نا انصافی کی ہے، جبکہ وہ پاکستان جیل جائے بغیر آنا چاہتے ہیں۔ نواز شریف معاشی پالیسوں سے بالکل مطمئن نہیں اور وفاقی وزیر خزانہ مفتاح اسماعیل کی کارکردگی انہیں بالکل نہیں بھا رہی۔انہوں نے بار بار کہا کہ میں نے تو پہلے ہی کہا تھا کہ حکومت نہ لیں اور الیکشن کی طرف جائیں، ایسا لگتا ہے کہ نواز شریف نے ذہن بنالیا ہے کہ اگر کوئی معاشی پالیسی وہ چاہتے ہیں تو وہ اسحاق ڈار ہی کے ذریعے ہوگی، وہ مفتاح اسماعیل پر اعتماد نہیں کررہے اور سمجھتے ہیں کہ وزیرخزانہ کو معاشی پالیسیوں کا اتنا علم نہیں۔
سہیل وڑائچ نے لندن میں نواز شریف سے ملاقات کا احوال بتاتے ہوئے کہا کہ نواز شریف کا اگلا بیانیہ اسٹیبلشمنٹ نہیں بلکہ عدلیہ کے خلاف ہوگا۔ نواز شریف سپریم کورٹ کو اپنے ساتھ ہونے والی زیادتیوں پر خط لکھیں گے۔سہیل وڑائچ نے یہ بھی کہا کہ نواز شریف مریم سے وہ بہت مطمئن ہیں، وہ خوش ہیں کہ جو میں کہتا ہوں مریم وہ کرتی ہیں۔
سہیل وڑائچ کی اس گفتگو کے بعد نواز شریف نے اپنے بیان میں اس تاثر کی نفی کی ہے کہ وہ شہباز شریف کی پالیسیوں سے خوش نہیں ہیں۔ نوازشریف کے اس وضاحتی بیان سے یہ بات بھی سامنے آتی ہے کہ شہباز شریف حکومت کے اقدامات کو نواز شریف کی حمایت حاصل ہے۔ یوںمحمدنواز شریف کا یہ وضاحتی بیان شہباز شریف کے بیانیہ اور اس بیانئے پہ ان کی رضامندی کا اظہار بھی ہے ۔ نواز شریف کے اس بیان سے یہ اہم سوال بھی پیدا ہوتا ہے کہ کیا غاصبانہ حاکمیت کے نیچے کام کرتے ہوئے پاکستان کو ان ہولناک مصائب اور مشکلات سے نکالا جا سکتا ہے؟

واپس کریں