عالمی ادارے مقبوضہ کشمیر میں پانچسو دن سے مسلسل جاری ہندوستانی فوج کا محاصرہ ختم کرائیں، وزیر اعظم آزاد کشمیر راجہ فاروق حیدر خان
No image اسلام آباد(کشیر رپورٹ) وزیر اعظم آزادجموں وکشمیر راجہ محمد فاروق حیدرخان نے کہا ہے کہ مقبوضہ کشمیر میں ہندوستان کے بدترین فوجی محاصرے کو آج 500دن ہو گئے ۔مقبوضہ کشمیر کے عوام اس وقت دنیا کی سب سے بڑی دہشتگردی کا مقابلہ کررہے ہیں۔ ہندوستان گزشتہ ایک سال چار ماہ سے مقبوضہ کشمیر کے بے کس اور بے گناہ شہریوں کو دنیا کی سب سے بڑی جیل میں رکھ کر ان پر انسانی تاریخ کے بدترین مظالم ڈھارہا ہے لیکن بدترین فوجی محاصرے کے500دن گزرنے کے باوجود بھی ان کے پائیہ استقلال میں لغزش نہیں آئی ۔ اقوام متحدہ اور عملی ادارے کشمیریوں کو ظلم و جبر سے نجات دلانے کیلئے اپنا عملی کردار ادا کریں۔ اپنے ایک خصوصی بیان میں وزیر اعظم نے کہاکہ مقبوضہ کشمیر کے عوام پر ہندستان کی بزدل فوج ظلم و جبر کی انتہاکررہی ہے لیکن اقوام متحدہ اور انسانی حقوق کی عالمی تنظیمیں اور ادارے خاموش تماشائی بنے ہوئے ہیں ۔ مقبوضہ کشمیر میںجتنا ظلم ہوا ہے شاید ہی انسانی تاریخ میں ایسی مثال ملتی ہو ۔انہوں نے کہاکہ کشمیری عوام ہندوستان کے ظلم و جبر کے سامنے نہ جھکے ہیں نہ جھکیں گے ۔ وزیر اعظم نے مطالبہ کیا کہ اقوام متحدہ اور بین الاقوامی ادارے اور تنظیمیں مقبوضہ کشمیر میں ہندوستان کا فوجی محاصرہ ختم کروائیں اور کشمیریوں کو ان کا بنیادی حق حق خودارادیت دلوانے کیلئے اقوام متحدہ اپنا عملی کردار ادا کرے۔
وزیر اعظم آزادجموں وکشمیر راجہ محمد فاروق حیدرخان نے سیز فائر لائن کے باغسر سیکٹر میں جام شہادت نوش کرنے والے افواج پاکستان کے دو جوانوں کو خراج عقیدت پیش کرتے ہوئے کہا ہے کہ افواج پاکستان دفاع وطن کیلئے بہادری اور جرات کی بے مثال تاریخ رقم کی ہے ۔ سیز فائر لائن پربسنے والے آزادکشمیر کے عوام بھی افواج پاکستان کے شانہ بشانہ دفاع وطن کیلئے قربانیاں دے رہے ہیں۔
وزیر اعظم آزادجموں وکشمیر راجہ محمد فاروق حیدرخان نے آرمی پبلک سکول پشاور کے شہداکو سلام عقیدت پیش کرتے ہوئے کہا ہے کہ اس سانحے کو چھ برس گزرنے کے بعد بھی ہمارے دل آج بھی زخمی ہیں۔اس دن کو یاد کرکے کوئی اپنے آنسو نہیں روک سکتا۔ایک بیان میںانہوں نے کہا کہ یہ وہ دن تھا جس کا سورج حسین تمناوں کے سنگ طلوع ہوا مگر غروب معصوم و بے قصور بچوں کے لہو کے ساتھ ہوا جس نے ہر درد دل رکھنے والے انسان کو رلا دیا۔وزیر اعظم نے کہاکہ 16 دسمبر 2014 کوشہید ہونے والے ان بچوں کے عظیم والدین کو بھی سلام پیش کرتا ہوں۔

واپس کریں