وزیر اعظم آزاد کشمیر راجہ فاروق حیدر سے شاہد خاقان عباسی اور مریم اورنگزیب کی کشمیر ہائوس میں ملاقات
No image اسلام آباد۔ وزیر اعظم آزادکشمیرراجہ محمد فاروق حیدرخان نے کہا ہے کہ مسلم لیگ ن کی حکومت نے اقتدار میں آنے کے بعد جماعت کے منشور کے مطابق آئین گڈگورننس کا نفاذاور میرٹ کا قیام عمل میں لایا اور عوام کی مشکلات کو دیکھتے ہوئے پالیسیاں بناکر ان پر عملدرآمد کیا۔آزادکشمیر کی ترقی اور خوشحالی کیلئے قائد مسلم لیگ ن محمد نواز شریف کی سرپرستی ناقابل فراموش رہی ہے ۔
وزیر اعظم آزادجموں وکشمیر و صدر مسلم لیگ ن راجہ محمد فاروق حیدرخان سے سابق وزیر اعظم پاکستان و مسلم لیگ ن کے سینئر رہنما شاہد خاقان عباسی اور مسلم لیگ ن کی مرکزی ترجمان مریم اورنگزیب نے جموں وکشمیر ہائوس میں ملاقات کی ۔ ملاقات میں مقبوضہ کشمیر میں ہندوستانی افواج کے مظالم اور گزشتہ برس پانچ اگست سے جاری ہندوستانی فوجی محاصر ے کی شدید مذمت کی گئی۔ ملاقات میں سیز فائر لائن پر ہندوستانی فورسز کی بلا اشتعال فائرنگ ، سیز فائر لائن پر معصوم شہریوں کو نشانہ بنانے کی بھی شدید مذمت کی گئی۔ وزیر شہری دفاع احمد رضا قادری بھی اس موقع پرموجود تھے ۔
وزیر اعظمراجہ محمد فاروق حیدرخان نے کہاکہ مسلم لیگ ن آزادکشمیر کی حکومت کی اولین ترجیح تحریک آزادی کشمیر ہے اور اس کیلئے ہم نے بھرپور اقدامات اٹھائے ۔ انہوں نے کہاکہ مقبوضہ کشمیر میں بھارت کی نولاکھ فوج نے گزشتہ برس پانچ اگست کے بعد سے کشمیریوں کو محصور کیا ہوا ہے اور وہ بھارت کے فوجی محاصرے میں بھارتی فوج کے انسانیت سوز مظالم کا نشانہ بن رہے ہیں۔ سیز فائر لائن پر بھی بھارت اشتعال انگیزی کر کے معصوم شہریوں کو نشانہ بناتا ہے ۔ گزشتہ دنوں اقوام متحدہ کے مبصر بھی بھارتی فوج کی اشتعال انگیزی سے نہ بچ سکے ۔ وزیر اعظم نے کہاکہ شاہد خاقان عباسی نے بطور وزیر اعظم پاکستان کمال مہربانی کرتے ہوئے ہمارے دیرینہ مسائل حل کیے جس پر ان کے شکرگزار ہیں۔ انہوں نے کہاکہ مسلم لیگ ن کی حکومت اپنی کارکردگی کی بنیاد پر آئندہ الیکشن میں جائے گی اوہماری کارکردگی کا فیصلہ عوام کریں گے۔
اس موقع پر گفتگو کرتے ہوئے سابق وزیر اعظم پاکستان شاہد خاقان عباسی نے کہاکہ مقبوضہ کشمیر کے عوام کے غیر متزلزل جذبے اور ہمت کو سلام پیش کرتے ہیں جو ہندوستان کے بدترین مظالم کے سامنے حق کی صدا بلند کررہے ہیں۔ انہوں نے کہاکہ سیز فائر لائن پر ہندوستان مسلسل خلاف ورزیاں کررہا ہے اور آئے روز معصوم شہریوں کو نشانہ بنایا جارہا ہے ۔ اقوام متحدہ ہندوستان کی خلاف ورزیاں کا نوٹس لے ۔ شاہد خاقان عباسی نے کہاکہ راجہ محمد فاروق حیدرخان کی قیادت میں مسلم لیگ ن آزادکشمیر کی کارکردگی گزشتہ ساڑھے چار سالوں کے دوران شاندار رہی ہے۔ راجہ فاروق حیدرخان کی سربراہی میں آزادکشمیر میں تیزی سے تعمیروترقی ہوئی ۔ مسلم لیگ ن آزادکشمیر کی حکومت نے عوام کا معیار زندگی بلند کرنے کیلئے اقدامات اٹھائے ، بالخصوص کورونا وباکے دوران راجہ فاروق حیدرخان کے اقدامات کی تعریف دنیا بھر میں کی گئی۔
واپس کریں