میر پور ڈرائی پورٹ کا قیام وزیر اعظم آزاد کشمیر کی خصوصی دلچسپی سے عمل میں آیا، چیئر مین' فرحت علی میر کی زیر صدارت 'سی بی آر' کا اجلاس
No image مظفر آباد( کشیر رپورٹ)چیئرمین آزاد جموں و کشمیر سنٹرل بورڈ آف ریونیو فرحت علی میر کی زیرصدارت سنٹرل بورڈ آف ریونیو کا دوسرا باضابطہ اجلاس جمعرات کے روز منعقد ہوا۔ اجلاس میں سینئر ممبر بورڈ آف ریونیو فیاض علی عباسی، سیکرٹری سروسز/سیکرٹری ان لینڈ ریونیو ڈاکٹر لیاقت حسین چوہدری، سیکرٹری مالیات عصمت اللہ شاہ، کمشنرز محکمہ ان لینڈ ریونیو اور ایڈیشنل سیکرٹری سروسز چوہدری محمد یونس نے شرکت کی۔ اجلاس میں سینٹرل بورڈ آف ریونیو کی جانب سے دوسری سہ ماہی کے اختتام پر ٹیکس اکٹھا کرنے کے اہداف طے شدہ اہداف سے زیادہ حاصل کرنے پر محکمہ کی کارکردگی کو سراہا گیا جبکہ ریونیو اکٹھا کرنے کے نظام میں مزید بہتری لانے اور محکمہ کو درپیش مسائل پر غور و خوض کیا گیا۔ اجلاس میں بورڈ کے گزشتہ اجلاس میں کیئے گئے فیصلہ جات پر عملدرآمد کا جائزہ لیتے ہوئے اطمینان کا اظہار کیا گیا۔ بورڈ نے محکمانہ قواعد کے جائزہ کے لیے قائم کمیٹی کی سفارشات کو سراہتے ہوئے مجوزہ قواعد اور بورڈ کی تشکیل نو کے لیے قائم کمیٹی کی سفارشات اور سیکرٹری بورڈ کی تعیناتی کی منظوری دی۔
اجلاس سے خطاب کرتے ہوئے چیئرمین آزاد جموں و کشمیر سنٹرل بورڈ آف ریونیو فرحت علی میر کہا کہ محکمہ ان لینڈ ریونیو کے انتظامی، دفتری مکانیت اور قانونی معاملات کا جائزہ لیتے ہوئے محکمہ کو بتدریج مستحکم، استعداد کار میں اضافہ اور ٹیکس جمع کرنے کے نظام کو مو ثر بنایا جائے گا۔ چیئرمین سینٹرل بورڈ آف ریونیو آزادجموں وکشمیر نے فیڈرل بورڈ آف ریونیو کی جانب سے آزادکشمیر میں میرپور کے مقام پر ڈرائی پورٹ کے قیام کی منظوری پر حکومت پاکستان کا شکریہ ادا کیا۔انہوں نے کہا کہ میرپور میں ڈرائی پورٹ کے قیام کے سلسلہ میں تقریبا گزشتہ دو دہائیوں سے کوششیں جاری تھیں لیکن بعض آئینی و قانونی دشواریوں کے پیش نظر اس مسئلہ کا حل ممکن نہ ہوا تاہم آزاد کشمیر میں سنٹرل بورڈ آف ریونیو کے قیام کے بعد فیڈرل بورڈ آف ریونیو کے ساتھ مسلسل رابطہ اور متعدد میٹنگز کے بعد چیئرمین فیڈرل بورڈ آف ریونیو کی خصوصی دلچسپی کے نتیجہ میں میرپور میں ڈرائی پورٹ کے قیام کا حتمی فیصلہ کیا گیا ۔چیئرمین 'سی بی آر' فرحت علی میر نے کہا کہ آزادکشمیر میں صنعتی ترقی اور تجارتی سرگرمیوں کی ترویج کے سلسلہ میں میرپور ڈرائی پورٹ کا قیام ایک خوش آئند فیصلہ ہے جس پر آزادکشمیر کے صنعت کار و سرمایہ کار حضرات کو ایک بڑی سہولت دستیاب ہو گی اور یہ اقدام وزیراعظم آزادکشمیر کی خصوصی دلچسپی کے باعث نتیجہ خیز ہوا ہے۔ یاد رہے کہ آزادکشمیر میں ڈرائی پورٹ کا قیام سمبڑیال سیالکوٹ کی طرز پر صنعت کاران کے ایوان کی معاونت سے روبہ عمل ہو گا۔
واپس کریں