کشمیری شہداء کی قربانیاں آزادی کے لئے ہیں، وزیر اعظم آزاد کشمیر راجہ فاروق حیدر خان
No image مظفر آباد۔وزیراعظم آزادجموں و کشمیر راجہ محمد فاروق حیدر خان نے کہا ہے کہ شہید مقبول بٹ نے آنے والی نسلوں کیلئے اپنی جان جان آفریں کے سپر د کر دی اور ثابت قدمی کے ساتھ اپنے عزم پر ڈٹے رہے ۔ مقبول بٹ شہید جدوجہد آزادی کشمیر کا وہ ستارہ ہے جس نے تحریک آزادی کشمیر کو نئی سمت دی ، مقبول بٹ شہید نے بھارتی ہتھکنڈوں کے سامنے جھکنے سے انکار کر دیا ۔جدوجہد آزادی میں شہید ہونے والے تمام عظیم مجاہدوں کو سلام پیش کرتا ہوں ۔مقبوضہ کشمیر کے عوام کی لازوال قربانیوں کے طفیل کشمیرکی آزادی اور ہندوستان کی بربادی نوشتہ دیوار ہے ۔ ہندوستان سے آزادی ہر کشمیری کے خون میں شامل ہے ۔ مقبوضہ وادی میں سبز ہلالی پرچموں میں شہداکو دفنانے والے جس عظیم مقصدکیلئے قربانیاں دے رہے ہیں انشااللہ اس میں ضرور کامیاب ہونگے ۔ شہید مقبول بٹ اور افضل گورو شہید نے جموں کشمیر کے مظلوم اور محکوم عوام کے حق آزادی اورحق خودارادیت کے حصول کیلئے اپنی جان کا نذرانہ پیش کر کے ایک روشن مثال قائم کی۔ برہان مظفروانی، اشفاق وانی اور افضل گورو سمیت تحریک آزادی کے تمام شہداکشمیریوں کے ہیرو ہیں ۔ مقبول بٹ شہید کی برسی پر انہیں خراج عقیدت پیش کرتے ہوئے وزیرا عظم آزادجموں وکشمیر راجہ محمد فاروق حیدرخان نے کہاکہ مقبول بٹ شہید مفکر پاکستان حضرت علامہ اقبال سے بہت متاثر تھے۔کشمیری قوم کی جدوجہد آزدی بہت تاریخی اور جاندار ہے اور اس کی بنیاد فکر اقبال ہے جو خودی اور آزادی کے محرک ہیں۔ انہوں نے کہاکہ مقبول بٹ شہید کو بھارتی فوج کی جانب سے ریاست جموں وکشمیر پر غاصبانہ قبضے کا بہت رنج تھا اور انہوں نے بھارت کے اس ہٹ دھرم رویے کے خلاف فکری اور عسکری جدوجہد کو اپنایا۔ انہوں نے کہا کہ اقوام متحدہ نے کشمیریوں سے حق خود ارادیت کا وعدہ کر رکھا ہے جس کے لئے لاکھوں کشمیری اپنی جانوں کے نذرانے دے چکے ہیں۔ہندوستا ن نے پانچ اگست2019کے بعد سے مقبوضہ کشمیر کو فوجی محاصرے میں رکھا ہوا ہے اور ان پر انسانی تاریخ کے بدترین مظالم ڈھائے جارہے ہیں۔انہوں نے کہا بھارت نے جسطرح مقبول بٹ کو شہید کیا بعین اسی طرح افضل گرو کو بھی شہید کیا گیا اور ان کو بھی جیل کے احاطے میں دفنایا گیا بھارت اسطرح کے حربوں کے ذریعے کشمیریوں کے عزم کو توڑنا چاہتا ہے مگر وہ اس میں مکمل طور پر ناکام ہو چکا ہے ۔مقبول بٹ شہید کی قربانی کو ہمیشہ یاد رکھا جائے گا ۔
واپس کریں