وزیر اعظم راجہ فاروق حیدر خان کی متاثرین منگلا ڈیم کے ذیلی کنبہ جات اور آباد کاری کی یقین دہانی
No image میر پور۔وزیراعظم آزادحکومت ریاست جموں و کشمیر راجہ محمد فاروق حیدر خان سے متاثرین منگلا ڈیم کے نمائندہ وفد کی ملاقات۔ ذیلی کنبہ جات پر اہم پیش رفت۔ وزیراعظم نے رواں ماہ ایس ایم بی آر، کمشنر میرپور، ڈائریکٹر جنرل منگلا ڈیم ہاوسنگ اتھارٹی و دیگر افسران کا اجلاس بلا کر ذیلی کنبہ جات کا نوٹیفکیشن جاری کرنے اور آبادکاری کے آغاز کا عندیہ دے دیا۔ تفصیلات کے مطابق وزیراعظم آزادکشمیر راجہ محمد فاروق حیدر خان سے پی ڈبلیو ڈی ریسٹ ہاوس میں متاثرین منگلا ڈیم کے نمائندہ عمائدین راجہ محمد اعظم خان چئیرمین توسیع رابطہ کمیٹی، سردار رشید جمال سیکرٹری جنرل، مرزا عبدالبشیر جرال صدر ایکشن کمیٹی، مرزا عاشق جرال، راجہ تسلیم انجم صدر ینگ ایکشن فورم، عتیق احمد سدوزئی جنرل سیکرٹری، راجہ محمد رفیق صدر مسلم لیگ ن نیوسٹی، راجہ رب نواز، راجہ ظفر، مرزا بشارت جرال، راجہ اقبال کیانی، مرزا الیاس، شکور زرگر، جاوید، مرزا لیاقت ، عادل واحد و دیگر نے سابق وزیر چوہدری محمد سعید کی قیادت میں ملاقات کی۔ متاثرین کے نمائندوں نے وزیراعظم کو ذیلی کنبہ جات کے حوالہ سے مسائل سے آگاہ کیا اور مطالبہ کیا کہ فوری طور پر ذیلی کنبہ جات کے لئے رقبہ کی نشاندہی و حدبندی کی جائے نیز آبادکاری کے لئے عملی اقدامات کا آغاز کیا جائے۔ وزیراعظم نے رواں ماہ اعلی سطحی اجلاس بلا کر ضروری نوٹیفکیشن کرنے اور ذیلی کنبہ جات منصوبہ پر عملی پیش رفت کی یقین دہانی کرائی۔ وزیراعظم نے کہا کہ متاثرین منگلا ڈیم کی قربانیاں لازوال ہیں۔ نیوسٹی اور سمال ٹاونز میں حکومت نے ترقیاتی کاموں پر ایک ارب سے زائد فنڈز خرچ کئے اور متاثرین کے مسائل حل کئے۔ حکومت ذیلی کنبہ جات اور دیگر ایشوز پر تیزی سے کام کر رہی ہے اور جلد متاثرین کو بڑی خوشخبری سننے کو ملے گی۔
واپس کریں