جدید سائنسی علوم ناگزیر ، تعلیم کسی بھی قوم کی ترقی کی بنیاد ہے،وزیر اعظم آزاد کشمیر راجہ فاروق حیدر خان
No image مظفرآباد۔ وزیر اعظم آزادجموں وکشمیر راجہ محمد فاروق حیدرخان نے کہا ہے کہ سیرت النبی بہترین ضابطہ حیات ہے ، ہم نے ایک قوم بن کر دنیا کا مقابلہ کرنا ہے ،اللہ تعالیٰ نے اس ملک کو ہر نعمت سے نوازا ہے ، ہمارے ملک میں لیڈرشپ کا فقدان ہے ،وطن عزیز کو قائد اعظم جیسے عظیم لیڈر کی ضرورت ہے۔دنیا میں آگے جانے کیلئے جدید سائنسی علوم کو اپنانا ناگزیر ہے، تعلیم کسی بھی قوم کی ترقی کی بنیاد ہے ، مسلم لیگ ن کی حکومت نے معیار تعلیم بلند کرنے کیلئے اقدامات اٹھائے ، اساتذہ کی سیاسی بنیادوں پر بھرتی والا کلچر ختم کرتے ہوئے اہل اور باصلاحیت لوگوں کو این ٹی ایس کے ذریعے بھرتی کیا، صاف و شفاف پی ایس سی کا قیام عمل میں لایا تاکہ پڑھے لکھے باصلاحیت لوگ اس شعبہ میں آئیں ،موبائل فون کا زیادہ استعمال ہماری اخلاقیات کو متاثرکررہا ہے ، اللہ تعالیٰ کسی پر اس کی استعداد سے زیادہ بوجھ نہیں ڈالتا ۔ان خیالات کا اظہار انہوں نجی ادارے کی تقریب میں بحیثیت مہمان خصوصی خطاب کرتے ہوئے کیا۔ اس موقع پر وزیر تعلیم بیرسٹرافتخارگیلانی، وزیر انفارمیشن ٹیکنالوجی ڈاکٹر مصطفی بشیر، ممبر اسمبلی رشید ترابی ودیگر بھی موجود تھے ۔
وزیر اعظم آزادکشمیر نے کہاکہ ہم سیرت النبی پر عمل پیرا ہوکر دنیا و آخرت میں کامیابی سے ہمکنار ہو سکے ہیں ۔ انہوں نے کہاکہ طلبہ محنت کریں گے تواس کا پھل پائیں گے ۔اللہ تعالیٰ اپنے بندے کو ڈھیل دیتا ہے کہ کب میرا بندا توبہ کرے گا اور ایک وقت آتا ہے کہ توبہ کے دروازے بند کر دیے جاتے ہیں ۔ وزیر اعظم آزادکشمیر نے کہاکہ کورونا وائرس نے پوری دنیا کو متاثر کیا ،کورونا وائرس کی وجہ سے طلبہ کیلئے مسائل پیدا ہوئے ، طلبہ کو اس مہلک وباء سے بچانے کیلئے تعلیمی اداروں کو بند کرنا پڑا ، طلبہ نے آن لائن کلاسز لیں تاہم دیہی علاقوں کے طلبہ کو انٹرنیٹ کی بہتر سہولت کے باعث زیادہ مسائل کا سامنا کرنا پڑا ۔ انہوں نے کہاکہ والدین کی ذمہ داری ہے کہ وہ اپنے بچوں کی تعلیم و تربیت کے حوالہ سے اپنا فرائض پورے کریں ، ٹیچرز سے رابطہ رکھیں اور بچوں کی حوصلہ افزائی کریں ۔ انہوں نے کہاکہ موبائل فون کا زیادہ استعمال وقت کا ضیاع اور صحت کے لیے بھی مضر ہے اس حوالہ سے غور فکر کرنے کی ضرورت ہے ۔ وزیرا عظم نے کہاکہ اساتذہ کی تنخواہوں اورسکیل کا معاملہ بھی حل کررہے یں ۔

واپس کریں