ٹیولپ گارڈن مظفر آبادکشمیریوں کی قربانیاں یاددلاتا ہے،اصل سیز فائر مقبوضہ کشمیر میں ہونا ہے، وزیر اعظم راجہ فاروق حیدر خان
No image مظفرآباد۔وزیر اعظم آزادجموں وکشمیر راجہ محمد فاروق حیدرخان نے سرینگر مقبوضہ کشمیر کے ٹیولپ گارڈن کی طرز پر دارلحکومت مظفرآباد میں بنائے گئے ٹیولپ گارڈن جلال آباد میں ٹیولپ فیسٹیول کا افتتاح کردیا۔ اس موقع پر میڈیا سے گفتگو کرتے ہوئے وزیراعظم راجہ محمد فاروق حیدرخان نے کہاکہ کشمیر کو گل لالہ بنانے کے لیے وہاں کے غیور لوگوں نے اپنا خون دیا ،عصمتیں لٹائیں ،یہ پھول ان کی لازوال قربانیوں کی یاد دلاتے ہیں اور ہمارے عزم کو مزید مستحکم کرتے ہیں۔سرینگر کے ساتھ میراروحانی رشتہ ہے ، میری والدہ سرینگر سے تھیں ، میری خواہش ہے کہ آزاد شہری کی حیثیت سے سرینگر جاں ، اپنی والدہ کے گھرجاں جہاں وہ رہتی تھیں۔ آزادکشمیر کا آئندہ الیکشن کشمیر پالیسی اور خطے کے تشخص کے حوالے سے اہم ہے، عوام اس مرتبہ سوچ سمجھ کر ووٹ دیں۔وزیر اعظم آزادکشمیر نے کہاکہ ہندوستان مقبوضہ کشمیر کی صورتحال سے دنیا سے اوجھل رکھنا چاہتا ہے ، لائن آف کنٹرول پر سیز فائر ہوا ہے اصل سیز فائر مقبوضہ کشمیر میں ہونا ہے، ہندوستان اس واقعے سے دنیا کو کہے گا کہ ہمارے حالات نارمل ہو رہے ہیں۔ دو طرفہ مذاکرات کشمیریوں کیلئے زہر قاتل ہیں،سہہ فریقی مذاکرات ہوں،اصل فریق کشمیری ہیں جنہوں نے سرزمین کا فیصلہ کرنا ہے۔وزیراعظم نے کہا کہ موجودہ حکومت پاکستان سے مایوسی ہوئی ہے وہ پانچ اگست کے بعد دنیا کے سامنے اس معاملے کو پیش نہیں کر سکی۔وزیر اعظم نے کہاکہ چیئرمین کشمیر کمیٹی نابلد اورکشمیر کے حوالہ سے نااہل ہیں ، علی گیلانی کے حوالہ سے چیئرمین کشمیر کمیٹی نے جو بیان دیا اس پر اپنے گریبان میں جھانکنا چاہیے، کشمیر کمیٹی والے بیان دے کر عمر عبداللہ، فاروق عبداللہ کو خوش کرنا چاہتے ہیں، میں اس بیان کی مذمت کرتا ہوں۔وزیر اعظم نے کہاکہ کشمیری بھارتی ظلم کے پنجے میں جکڑے ہوئے ہیں، تحریک آزادی کے لیے قربانیاں دینے والوں کو سلام پیش کرتاہوں، وہ وقت دور نہیں کشمیریوں کا لہو ہندوستان کی تباہی کا سبب بنے گا اور مقبوضہ کشمیر سے ہندوستان کے ناپاک قدم اکھڑ یں گے ۔اس موقع پروزیر وائلڈ لائف و فشریز راجہ جاوید اقبال ، ایڈیشنل چیف سیکرٹری جنرل فرحت علی میر،سیکرٹری زراعت ڈاکٹر شہلاوقار، سیکرٹری جنگلات سید ظہور الحسن گیلانی، سیکرٹری لوکل گورنمنٹ و دیہی ترقی اعجا ز احمد خان ، سیکرٹری وائلڈ لائف سردار جاویدایوب ، ڈائریکٹر جنرل اطلاعات راجہ اظہرا قبال ، ڈائریکٹرجنرل زراعت بشیر بٹ ، کمشنر مظفرآباد ڈویژن تہذیب النسابھی موجود تھے۔ وزیر اعظم آزادکشمیر خصوصی ہدایت پر سرینگر گل لالہ گارڈن کی طرز پر بنائے گئے لالہ زار کے رنگ برنگے پھولوں پر مشتمل گارڈن عوام کی دلچسپی کا مرکز بن گیا۔وزیر اعظم آزادکشمیر نے اس موقع پر ٹیولپ گارڈن میں پودا بھی لگایا۔
محکمہ وائلڈ لائف و فشریز کے زیر اہتمام World Wild life Dayکے حوالہ سے منعقدہ تقریب سے خطاب کرتے ہوئے وزیر اعظم آزادجموں وکشمیر راجہ محمد فاروق حیدرخان نے کہاکہ جنگلات ہمارا قیمتی اثاثہ ، ان محفوظ کرنے کیلئے محکمہ اپنا کردار ادا کرے ،غیر قانونی شکار پر سختی کی جائے ۔ انہوں نے کہاکہ جنگلات کو محفوظ رکھنے کیلئے سخت قانون سازی کررہے ہیں ۔ آزادکشمیر میں ڈویژن ، اضلاع اور تحصیل کی سطح پر اعزازی گیم وارڈن مقرر کریں گے ۔انہوں نے کہاکہ پرندے ہمارے ماحول کی رونق ہیں ، ان کی حفاظت یقینی بنائی جائے ۔ سڑکوں کی تعمیر اور انفراسٹرکچر کے پھیلا سے جنگلات کو بہت نقصان پہنچا ۔ ماحولیاتی تبدیلیوں کی وجہ سے موسمی پرندوں نے بھی روٹ تبدیل کرلیے ہیں،ہندوستان کی جانب سے سیز فائر لائن پر باڑ سے بھی جنگلی حیات متاثر ہوئیں، اس معاملے کو میڈیا عالمی سطح پر اجاگر کرنے کیلئے کردار ادا کرے ۔ تقریب سے وزیر وائلڈ لائف و فشریز راجہ جاوید اقبال ، سیکرٹری وائلڈ لائف سردار جاوید ایوب اور ڈائریکٹر وائلڈ لائف نعیم ڈار نے بھی خطاب کیا۔

واپس کریں