پارلیمانی پارٹی آزاد کشمیر میں نواز شریف سے وفاداری نبھائے گی،وزیر اعظم آزاد کشمیر راجہ فاروق حیدرخان
No image اسلام آباد۔ وزیر اعظم آزادجموں وکشمیر وصدرمسلم لیگ ن راجہ محمد فاروق حیدرخان نے کہا ہے کہ آزادکشمیر میں ہم نے روایتی سیاسی کلچر تبدیل کیا ہے، ہر آنے والی حکومت کے ساتھ جانے کے بجائے ہم میاں محمد نوازشریف کے ساتھ کھڑے رہے،مسلم لیگ ن آزادکشمیر کی پارلیمانی پارٹی نے محمدنوازشریف کے ساتھ وفاداری کا عزم کیا ہوا ہے اور انشا اللہ اس کو نبھائیں گے، ملکر آئندہ انتخابات میں بھرپورکامیابی حاصل کریں گے، مریم نواز شریف کو خوش آمدید کہتا ہوں، محمد نواز شریف قائد اعظم کا جو پرچم ہمارے ہاتھ میں دیاتھااس کو کبھی گرنے نہیں دیں گے، محمد نواز شریف نے ہمیں اختیاربھی دیا اور کبھی بھی کسی قسم کی سفارش نہیں، محمد نواز شریف نے ہم پر بہت احسانات کیے، ہمارے، دیرینہ و حل طلب مسائل کو حل کیا اور ہمارے ساتھ خصوصی شفقت کرتے ہوئے ترقیاتی بجٹ دوگنا کیا جس سے آزادکشمیر پائیدار ترقی کی طرف گامزن ہوا۔
ان خیالات کا اظہار وزیر اعظم آزادجموں وکشمیر صدرمسلم لیگ ن راجہ محمد فاروق حیدرخان نے مسلم لیگ ن آزادجموں وکشمیر پارلیمانی پارٹی کے اجلاس سے خطاب کرتے ہوئے کیا۔ اجلاس میں مسلم لیگ ن کی نائب صدر محترمہ مریم نواز شریف بھی شریک تھیں۔ اس موقع پر سیکرٹری جنرل مسلم لیگ ن آزادکشمیر شاہ غلام قادر نے مریم نواز شریف کو پارلیمانی پارٹی آزادکشمیر کی جانب سے خوش آمدید کہا۔ مریم نواز شریف نے کافی وقت جموں وکشمیر ہاس میں گزارا اور مسلم لیگ ن آزادکشمیر کی پارلیمانی پارٹی کے اراکین سے فردا فردا بات چیت کی اور ان کے حلقہ جات کے حوالے سے بھی تبادلہ خیال کیا۔ اجلاس سے سیکرٹری جنرل پاکستان مسلم لیگ ن احسن اقبال، سیکرٹری جنرل شاہ غلام قادر،سینئر نائب صد مسلم لیگ ن آزادکشمیر چوہدری طارق فاروق، چیف آگنائزر راجہ مشتاق احمد منہاس، چوہدری محمد عزیز، راجہ نثار احمد خان اور محترمہ نورین عارف نے بھی خطاب کیا جبکہ اجلاس میں مسلم لیگ ن آزادکشمیر کی پارلیمانی پارٹی کے تمام اراکین موجود تھے۔
مسلم لیگ ن آزادکشمیر کی پارلیمانی پارٹی کے اجلاس سے خطاب کرتے ہوئے محترمہ مریم نواز شریف نے کہاکہ راجہ محمد فاروق حیدرخان میرے دل کے وزیر اعظم ہیں، آفریں ہے راجہ محمدفاروق حیدرخان پر جس طرح انہوں اور ان کی ٹیم نے آزادکشمیر کی سیاست اور کلچر بدل کر رکھ دیا، پہلے پاکستان میں جو حکومت آتی تھی تو آزادکشمیر میں وفاداریاں تبدیل ہو جاتی تھیں،آزادکشمیر میں وہی حکومت بناتا تھا جس کی پاکستان میں حکومت ہوتی تھی لیکن مسلم لیگ ن کی پارلیمانی پارٹی کو خراج تحسین پیش کرتی ہوں کہ جس طرح وہ متحد و منظم ہیں محمد نواز شریف اوراپنی جماعت کے ساتھ وفا نبھاتے ہوئے دھونس د دھاندلی اور جبر کا مقابلہ کرنے کیلئے تیار ہیں۔ انہوں نے کہاکہ مسلم لیگ ن نہ جیبوں پر ہاتھ ڈالنے دے گی اور نہ اپنے ووٹوں پر ڈاکہ ڈالنے دے گی۔ راجہ فاروق حیدر اور انکی پارلیمانی پارٹی متحد ومنظم ہے، ن لیگ آزاد کشمیر میں بھاری اکثریت سے جیتے گی۔انہوں نے کہاکہ آزاد کشمیر میں مینڈیٹ چوری کرنے کی کوشش کی گئی تو جان لیں عوام جاگ رہے ہیں۔انہوں نے کہاکہ راجہ فاروق حیدرخان اور ان کی ٹیم نے جس دلیرانہ انداز سے مسلم لیگ ن اور محمد نواز شریف سے وفاداری نبھائی ہے وہ لائق تحسین ہے۔سیکرٹری جنرل پاکستان مسلم لیگ ن احسن اقبال نے کہاکہ راجہ محمد فاروق حیدرخان کو مبارکباد پیش کرتا ہوں کہ وہ جس طرح ڈٹ کر نواز شریف کے ساتھ کھڑے رہے، آزادکشمیر کے عوام کو خوشخبری سناتا ہوں کہ آزادکشمیر کے الیکشن سے پہلے پاکستان میں تبدیلی آجائے گی اور مسلم لیگ ن انشا اللہ بھاری اکثریت سے آزادکشمیر میں کامیاب ہوگی۔ انہوں نے کہاکہ پاکستان کیلئے کشمیر کی حیثیت شہ رگ کی سی ہے، کبھی ہندوستان کو جرات نہیں ہوئی کہ کشمیر کی طرف میلی آنکھ سے دیکھے مگر موجودہ حکومت کی نااہلی کی وجہ سے پانچ اگست کا واقعہ ہوا، پاکستانی پرچم سینے سے لگا کر گولیاں کھانے والوں کو نہ ہم بھول سکتے ہیں نہ بھولنے دیں گے۔ بدقسمتی سے حکومت پاکستان وہ کردارادا نہیں کر سکی جو اس کو کرنا چاہیے تھا۔

واپس کریں