آزاد کشمیر کے لوگ 13ویں آئینی ترمیم کے ثمرات سے مستفید ہوتے رہیں گے، تمام حلقوں میں یکساں ترقی ہوئی،وزیر اعظم راجہ فاروق حیدر خان
No image مظفر آباد۔ وزیر اعظم آزاد کشمیر راجہ محمد فاروق حیدر خان نے کہا کہ ہم نے آزاد کشمیر کے تمام علاقوں میں تعمیر و ترقی کے لیے بلا تخصیص فنڈز فراہم کیے، گزشتہ ادوار میں جس ضلعے کا وزیر اعظم ہوتا تھا سارے فنڈز اسی ضلعے میں جاتے تھے، ہمارے دور میں آزاد کشمیر کے تمام حلقوں میں یکساں ترقی ہوئی،مسلم لیگ ن نے عوامی ضرورت کے مطابق ترقیاتی منصوبے لگائے گئے، ہم نے عام آدمی کو اسکی دہلیز پر سہولیات فراہم کرنے کے لیے پالسیاں مرتب کر کے ان پر عملدرآمد کیا، مسلم لیگ ن کے دور کا کسی اور حکومت سے تقابلی جائزہ نہیں کیا جاسکتا، ہماری حکومت نے مالیاتی ڈسپلن قائم کیا، تیرہویں آئینی ترمیم کے ثمرات سے آزاد کشمیر کے لوگ مستفید ہوتے رہیں گے۔ انہوں نے کہا کہ پہلے مرحلے میں ہم نے بین الا اضلاعی سڑکات کی اپ گریڈیشن کی اور اس کے بعد لنک روڈز اور کمیونٹی انفرا سٹرکچر ڈویلپمنٹ پروگرام کے تحت منصوبے لگائے۔
وزیراعظم آزاد کشمیر راجہ فاروق حیدر خان سے یونین کونسل سیناں دامن کے وفد نے ملاقات کی۔ ملاقات میں ٹھیکیدار نجیب اللہ اعوان ، چوہدری اکرم عالم ، خورشید مغل ، سردار حمید ، شیخ احمد دین ، حسن دین مغل ، بشیر مغل ، یاسر رشید فاروقی ، گلزمان شیخ ، راجہ دانش و دیگر شامل تھے۔ ملاقات میں وفد کی جانب سے وزیراعظم آزاد کشمیر راجہ فاروق حیدر خان کی طرف سے یونین کونسل میں کیئے گئے جملہ ترقیاتی کاموں پر وزیراعظم کا شکریہ ادا کرتے ہوئے انہیں خراج تحسین پیش کیا۔
وزیر اعظم راجہ فاروق حیدر نے اس موقع پر کہا کہ آزاد کشمیر کا ترقیاتی بجٹ محمد نواز شریف نے دوگنا کیا جس سے خطہ میں تعمیر و ترقی کے نئے دور کا آغاز ہوا۔ ہمارے دیرینہ مسائل بھی محمد نواز شریف کی کمال مہربانی سے حل کیے۔ صحت،تعلیم سمیت ہر شعبہ میں اصلاحات کیں۔ ریاستی آمدن بڑھائی اور اخراجات کم کیے۔ انہوں نے کہا کہ سخت فیصلے نہ کرتے تو لوگوں کا سسٹم سے اعتبار اٹھ جاتا۔اس موقع گفتگو کرتے ہوئے عمائدین نے کہا کہ آئندہ الیکشن کی تیاریاں شروع کی جا چکی ہیں انشااللہ کارکردگی کی بنیاد پر مسلم لیگ ن دوبارہ حکومت بنائے گی۔سینا دامن کے وفد نے وزیراعظم آزاد کشمیر راجہ فاروق حیدر خان سے یونین کونسل کے مسائل کے بارہ میں آگاہ کیا جس پر وزیراعظم آزاد کشمیر راجہ فاروق حیدر خان نے تمام مسائل کو ترجیحی بنیادوں پر حل کرنے کی یقین دہانی کروائی۔
واپس کریں