لاہور( کشیر رپورٹ) پنجاب اسمبلی کے نومنتخب ارکان نے جمعہ کو اسمبلی اجلاس میں حلف اٹھالیا ہے۔ اجلاس میں کل313ارکان اسمبلی نے حلف اٹھایا جن میں 215حکومتی اور98سنی اتحاد کونسل کے ارکان اسمبلی شامل ہیں۔اجلاس سپیکر سبطین خان کی صدارت میں شروع ہوا۔ سپیکر اور ڈپٹی اسپیکر کا انتخاب کل ہوگا،پنجاب اسمبلی کا اجلاس کل سہ پہر 4 بجے تک ملتوی کردیا گیا۔حلف اٹھانے والوں میں متوقع وزیر اعلی مریم نوا ز کے علاوہ مسلم لیگ ن کی سیکرٹری اطلاعات مریم اورنگزیب بھی شامل ہیں۔گزشتہ روز گورنر پنجاب محمد بلیغ الرحمن نے پنجاب اسمبلی کا اجلاس بلانے کا نوٹیفیکیشن جاری کیا تھا۔
پنجاب اسمبلی ملک کا سب سے بڑا منتخب ایوان ہے، جس کی 371 نشستیں ہیں، جن میں 297 جنرل نشستیں اور 74 مخصوص نشستیں ہیں، جن میں خواتین کی 66 اور اقلیتوں کی آٹھ نشستیں ہیں۔ اب تک الیکشن کمیشن آف پاکستان نے خواتین کے لیے 42 اور اقلیتوں کے لیے پانچ مخصوص نشستوں کے لیے نوٹیفکیشن جاری کیے ہیں۔اجلاس میں مسلم لیگ ن کے ملک احمد خان اور ملک ظہیر اقبال چنڑ نے پنجاب اسمبلی کے سپیکر اور ڈپٹی سپیکر کے لیے کاغذات نامزدگی جمع کرائے جبکہ سنی اتحاد کونسل کے ممبران احمد خان بھچر اور محمد معین الدین ریاض قریشی نے سپیکر اور ڈپٹی سپیکر کے عہدوں کے لئے کاغذات جمع کرائے ۔8 فروری کے انتخابی نتائج کے مطابق، مسلم لیگ (ن) نے پنجاب اسمبلی میں 138 جنرل نشستیں حاصل کیں، جب کہ پی ٹی آئی کے حمایت یافتہ آزاد امیدواروں نے 114 کا دعوی کیا۔پی ٹی آئی کے حمایت یافتہ 23 دیگر آزاد امیدواروں میں سے 20 نے مسلم لیگ ن میں شمولیت اختیار کی ہے۔نوٹیفائیڈ مخصوص نشستوں میں سے، مسلم لیگ (ن) نے خواتین کے لیے 36 اور اقلیتوں کے لیے پانچ نشستیں حاصل کی ہیں تاکہ اس کے ایم پی اے کی کل تعداد 199 ہو جائے، جو کہ 186 اراکین کی مطلوبہ سادہ اکثریت سے آرام سے ہے۔ پی پی پی کے پاس خواتین کے لیے تین مخصوص نشستیں ہیں، دو مسلم لیگ (ق) اور آئی پی پی کے پاس ایک نشست ہے۔
واپس کریں