کشیرِ نیبر یمو کأشریو علم وادب ،سماجی تہ سیاسی شعبن منز منز تھیکنی لایق کار کردگی ہأو تمن منز چھ آکھ نامدار کوشُر خواجہ حمید ممتاز.. یمو حال حالی پننہ زندگی ہند آلہ پلہ پانژ نمتھ وریہہ گزارتھ اسلام آباد پاکستانس منز امانت دیوت. مرزا عبدالحمید بیگ المعروف خواجہ حمید ممتاز زایہ سرینگرس منز پتمیہ صدی ہندس دویمس دہیلس ( 1928) منز. گریجویشن کرکھ امر سنگھ کالج سرینگرٕ پیٹھ1947 منز. گورنمنٹ کالیج لاہور (پنجاب یونیورسٹی) پیٹھ کرکھ ریاضی منز پوسٹ گریجویشن تہ آزاد کشیر منز کورکھر راولاکوٹ پونچھ پیٹھ بحثیت لیکچرار پنن تدریسی سفر شروع، مظفر آباد تہ میرپور ڈگری کالیجن ہنز پرنسپل شپ، سیکریٹری تعلیمات تہ اطلاعات تہ واریاہن شعبن ہنز سربراہی پتہ واتہ نو کھ 1988 منز پننہ سرکاری ملازمتک سفر اند.. تعلیمہ ہند شعبس منز روز حمید صأبس ممتاز حیثیت حاصل، اردو تہ انگریز ی ادبس سیتی روز تمن سیٹھاہ سرنی دلچسپی. انگریزس منز سپزہ تہنز زہ کتابہ شائع، پاکستانکین معروف انگریزی اخبارن منز ڈان، پاکستان ٹائمز، دی مسلم تہ بیہ واریاہن معیاری میگزینن منز رودی مختلف موضوعاتن پیٹھ کالم لیکھان، اردوس منز سپدی تہند چار شہر، رباعیات تہ چند سائے ناوٕ شعری مجموعہ شایع. کاشرِ زبانی منز لیوکھا تمو کینہہ تہ ننیو نہ ونہِ تاہم کاشر تہنز ماجہ زیو آسنہ کن اس تمن کاشر کرنس تہ اتھ لول ورتاونس پیٹھ فخر محسوس کران. کأشر زبأنی تہ ادبس سیتی تہ روز تمن سیٹھاہ سرنی دلچسپی، یمی باوتھ تمو AnAnothology o Kashmiri verse
ناوٕ کتابہِ منز کورمت چھ،یتھ منز الہ پلہ 62 ہن کاشرین شاعرن تہ گونماتن ہند121 منتخب کلام انگریزیس منز ترجمہ کرنہ آمت چھ. اتھ کتابہ منز چھ للہ عارفہ،شیخ نورالدین ولی،حبہ خاتون، محمود گامیس تہ رسل میرس پیٹھ احد زرگرس تام صوفی گونماتن ہند کلام، مہجور،ازاد،عارف، امین کامل، رحمان راہی، رسا، نادم، فراق، نازکی، ،خیال، ساقی، مظفرعازم، شفیع شوق تہ پاکستانس تہ آزاد کشیر منز روزن وألی کأشر شاعر ناز، کولگامی،طاؤس، احمدشمیم، ،تحسین جعفری، محمد علی کنول، مسعود کشفی، حفیط سالب،جی ایم لولابی،آزر عسکری،صبا سلمانی، تہ میر عزیز تہ بیہ وراہ شاعر تہ شامل کرنہ آمتی چھ. یہ کتاب چھ 1987 منز شایع سپزمژ.. یہ اوس سہ دور ییلہ کانہہ کاشر کتاب خال خالی نظرہ آس گژھان تہ اگر کانسہ نشہ آسہ ہا سو تہ اوس اتھ پننہ مرضی سیتی نیبریم گاش ہاوَن.. بہرحال ونن اوسم یہ اتھ دورس منز اوس نہ ازک پاٹھی امہ قسمک مواد دستیاب... توے چھ چھ حمید ممتاز صآٔبن کاشرِ زبانی ادبکی ژوکی در خواجہ عبدالصمد وانی ، مظفر فاضلی تہ خواجہ غلام احمد پنڑت صابن مواد آیتن تھاونس پیٹھ پننہ کتابہ منز خصوصی زکر کورمت. امہ کتابہ ہند چھ 2019 منز دویم ایڈیشن تہ چھاپ سپدمت...
یودوے کاشرِ زبأنی منز حمید ممتازکاشر پاٹھی کینہہ لیکھنس منز بظاہر خاموش رود مگر ریڈیو خأطرٕ رودی تم کاشرِ باپتھ پنن اتھ واس کنہ مختلف موضوعن پیٹھ نتہ کنہ رنگہ جاری تھاوِتھ... کتھ باتھ مزاکرہ، ڈرامہ، کأشر زبان تہ ادب، کشیر ہند تہزیب و تمدن، کشیر تہ پاکستان رودی تہند من پسند موضوعات..
حمید ممتاز نرم مزاج، خوش لباس تہ خوش گفتار آسہٕ ون ڈیکہ ہیتھ مدرس تہ میٹھس کاشرس لہجس منز کتھ باتھ کرن وول کأشر دانشور.. نیری پوش میگزینک گوڈنک شمارہ وچھتھ گیہ سیٹھاہ خوش تہ ییمچ باوتھ تہند سو چٹھی چھ یوسہ پتہ نیری پوش کس دویمس شمارس منز شایع تہ سپز.. کشیر ہندِ علم و ادبک یہ گاشہ تارکھ لوس 25 ستمبر 2024 تہ جمعہ دوہ آو اسلام آباد پاکستانس منز تہ تہند جسد خاکی او تتی سپرد خاک کرنہ... اللہ تعالٰی کرنکھ جنتس منز جاے آمین.
نیری پوش چھ بزرگ صحافی بشیر کشفی صآٔبن. ...... حمید ممتاز مرحومس متعلق واریاہ معلومات فراہم کرنس پیٹھ وژھِ وأنچہ شکریہ ادا کرا.
واپس کریں