دل بعض و حسد سے رنجور نہ کر
یہ نور خدا ہے اس سے بے نور نہ کر
مظفرآباد (پی آئی ڈی)7مارچ2024۔وزیر اعظم آزادحکومت ریاست جموں وکشمیر چوہدری انوار الحق نے کہا ہے کہ پچیس تیس برسوں پر محیط سٹیٹس کو کو ہر ممکن طور پر جڑ سے اکھاڑنے کی کوشش کی ہے۔ہم سب ریاست کے وسائل کے امانت دار ہیں۔برباد حال نظام حکومت کو صاف ستھرا نظام حکومت قائم کرنے کے لیے بھرپور اقدامات کر رہے ہیں۔ آزادکشمیر سے علاقائی ازم،برادری ازم،کرپشن، میرٹ کی پامالی کو ختم کر کے دم لوں گا۔ اعلانات کا قائل نہیں ہوں، عوامی منصوبے زمین پر نظر آئیں گے۔30جون تک تعلیم،لوکل گورنمنٹ، ہیلتھ، تعمیرات عامہ، ہائیڈل اور ٹورازم سے سٹیٹس کو ٹوٹتا نظر آئے گا اور عوام تبدیلی دیکھیں گے۔ہر انتخابی حلقہ میں تیس جون تک 1ارب سے زائدکے ترقیاتی منصوبے نظر آئیں گے۔ عوام کے ٹیکسوں پر بننے والی حکومت کے وزیراعظم اور کابینہ عوامی منصوبوں اور حکومت کی کارکردگی کے حوالہ سے ریاست کے ہر شہری کو جوابدہ ہیں۔ جب حلف اٹھایا تو بددیانتی اور کرپشن کا بازار گرم تھا،ریاست کی فلاح کا کوئی پروگرام کاغذ پر نظر نہیں آرہا تھا۔ ترقی یافتہ قوموں میں شامل ہونا ہے تو سٹیٹس کو کو توڑنا ہو گا۔ کسی کی بلیک میلنگ میں نہیں آئوں گا۔ اپنا کام آئینی طریقے سے کر تا رہوں گا۔ سٹیٹس کو کی سیاست کو دفن کر کے جائوں گا۔ جس دن سمجھا ضمیر مطمئن نہیں حلف کی پاسداری نہیں کر سکتا اسی دن عہدہ چھوڑ کر چلا جائوں گا۔ ان خیالات کا اظہار وزیراعظم آزادکشمیر چوہدری انوار الحق نے شاہ سلطان برج کی افتتاحی تقریب سے خطاب کر تے ہوئے کیا۔ اس موقع پر سینئر موسٹ وزیر کرنل ریٹائرڈ وقار احمد نور،اپوزیشن لیڈر خواجہ فاروق احمد,وزرا کرام فیصل ممتاز راٹھور، سردار جاوید ایوب،راجہ محمد صدیق خان،دیوان علی خان چغتائی، نثار انصر ابدالی، اکمل سرگالہ،سردار میر اکبر خان،چوہدری محمد رشید،چوہدری یاسر سلطان،جاوید بٹ،فہیم اختر ربانی،ملک محمد ظفر،عاصم شریف بٹ،چوہدری قاسم مجید،محترمہ تقدیس گیلانی،سیکرٹری صاحبان حکومت، سربراہان محکمہ جات،خواتین اور شہریوں کی کثیر تعداد بھی موجود تھی۔