دل بعض و حسد سے رنجور نہ کر
یہ نور خدا ہے اس سے بے نور نہ کر
مظفرآباد( پ ر) 11مارچ 2024۔صدر آزاد جموں وکشمیر بیرسٹر سلطان محمود چوہدری نے کہا ہے کہ حکومت آزاد کشمیر کے قیام کا بنیادی مقصد ہی مسئلہ جموں و کشمیر کو اجاگر کرنا ہے۔ اس سلسلے میں میں آزادی کے بیس کیمپ سے مودی کے مکروہ عزائم کو بے نقاب کرنے کے لیے 16مارچ سے میرپور سے عوامی رابطہ مہم کا آغاز کر رہا ہوں۔ جس میں مقبوضہ کشمیر میں جاری انسانی حقوق کی پامالیوں اور مسئلہ کشمیر پر خیالات کا اظہار کروں گا۔ میں نے اس سے قبل بھی نہ صرف آزاد کشمیر بلکہ یورپ، امریکہ، ترقی، مشرق وسطی سمیت دیگر اہم ممالک میں بھی ہندوستان کے فسطائی ایجنڈے اور مقبوضہ جموں وکشمیر میں انسانی حقوق کی سنگین خلاف ورزیوں کو بے نقاب کیا۔ جموں وکشمیر لبریشن سیل محدود وسائل میں بھرپور کام کررہاہے۔ کشمیر پالیسی ریسرچ انسٹیٹیوٹ نے مختصر وقت میں تحقیق اور نوجوانوں کو مسئلہ کشمیر کی تمام جہتوں سے اگاہ کرنے میں بھرپور کردار ادا کیا۔ ان خیالات کا اظہار انہوں نے آج یہاں ایوان صدر مظفرآباد میں جموں و کشمیر لبریشن سیل کی طرف سے دی جانے والی بریفنگ کے موقع پر اظہار خیال کرتے ہوئے کیا۔ ڈائریکٹر انتظامیہ و کشمیر پالیسی ریسرچ انسٹیٹیوٹ ڈاکٹر راجہ محمد سجاد خان نے بریفنگ دی۔ اس موقع پرصدارتی مشیر سردار امتیاز خان، سیکرٹری صدارتی امور ڈاکٹر ادریس عباسی، سیکرٹری لبریشن سیل مرزا وجاہت رشید بیگ اور دیگر بھی موجود تھے۔