دل بعض و حسد سے رنجور نہ کر
یہ نور خدا ہے اس سے بے نور نہ کر
مظفر آباد(پی آئی ڈی)07 دسمبر2024۔ ترجمان محکمہ زراعت آزادکشمیر نے ایک پریس ریلیز کے ذریعے واضح کیا ہے کہ جلال آباد پارک سے کسی قسم کی قیمتی لائٹس اور واٹر پروف الیکٹرک تاریں غائب نہیں ہوئیں۔ جلال آباد پارک دارلحکومت کا سب سے بڑا تفریحی پارک ہے۔ محکمہ زراعت کا عملہ دستیاب وسائل میں پارک کی تزئین و آرائش اور صفائی ستھرائی میں ہمہ وقت مصروف رہتا ہے۔ جلال آباد گارڈن تاریخی اہمیت کا حامل تفریحی پارک ہے۔ سال 1952میں محکمہ زراعت کے قیام کے بعد گارڈن کی دیکھ بھال کی ذمہ داری محکمہ کو تفویض کی گئی۔ جب یہ گارڈن محکمہ زراعت کے حوالہ ہوا اس وقت اس کا کل رقبہ 80 کنال 05 مرلے پر محیط تھا ۔ اسی رقبہ پر جملہ سرکاری رہائشگاہوں کیلئے سڑک اور خورشید نیشنل لائبریری جلال آباد تعمیر کی گئی اس طرح بقیہ رقبہ پر پارک تعمیر شدہ ہے اور اس رقبہ میں کسی قسم کی کوئی تجاوزات نہیں ہوئیں ۔ سال 2004 سے قبل جلال آباد گارڈن کیلئے کوئی باقاعدہ عملہ منظور شدہ نہ تھا۔ 2004 میں نظامت پارکس اینڈ ہارٹیکلچرکا قیام عمل میں لایا گیا اور جلال آبادگارڈن کو پبلک پارک کا درجہ دیتے ہوئے اس کیلئے محکمہ زراعت ، محکمہ تعمیرات عامہ عمارات ( مینٹینٹس ڈویژن) اور ترقیاتی ادارہ مظفر آباد سے آسامیاں منتقل کی گئیں۔ نظامت پارکس اینڈ ہارٹیکلچر کا کوئی بھی ملازم کسی بھی آفیسر کی رہائش گاہ پر مامور نہیں ہے ۔ اس وقت جلال آباد میں پارک کی دیکھ بھال کیلئے بڈر، مالی اور بیلداران کی تعداد 16 ہے۔ نظامت پارکس اینڈ ہارٹیکلچر کے تحت تعینات عملہ کو جلال آباد پارک کے علاوہ گلشن گلاب فیملی پارک گوجرہ اور ریاست کے دیگر اداروں کے گارڈن کی تزئین و آرائش اور دیکھ بھال کی ذمہ داری بھی تفویض کی گئی ہے۔ اس طرح جلال آباد پارک میں صرف 08 اہلکار ڈیوٹی سرانجام دے رہے ہیں۔