دل بعض و حسد سے رنجور نہ کر
یہ نور خدا ہے اس سے بے نور نہ کر
مظفرآباد (پی آئی ڈی)29ستمبر2022۔وزیرا عظم آزادحکومت ریاست جموں وکشمیر سردار تنویر الیاس خان نے کہا ہے کہ عمران خان نے آزادکشمیر میں احتساب اور عام آدمی کے لیے ریلیف کا ایجنڈہ دیا جس پر عملدرآمد جاری ہے۔ آزادکشمیر میں کرپشن کے ذریعہ مال بنانے والوں سے حساب لیں گے، یہ کسی کے باپ کا مال نہیں قوم کے خون پسینے کی کمائی ہے۔ چیئرمین تحریک انصاف عمران خان عالم اسلام کے لیڈر کے طورپر سامنے آئے ہیں۔ کشمیر النسل ہونے کے دعویداروں نے انڈیا کے ساتھ تجارت شروع کی اورا اقوام متحدہ میں کشمیر پر بات نہیں کی۔ اگلے چھ ماہ میں آزادکشمیر میں حقیقی تبدیلی نظر آئے گی۔ ان خیالات کا اظہار انہوں نے جمعرات کے روز یہاں یونیورسٹی گراونڈ میں چیئرمین تحریک انصاف عمران خان کے جلسہ عام سے خطاب کرتے ہوئے کیا۔ جلسہ عام سے چیئرمین پاکستان تحریک انصاف عمران خان،سابق وفاقی وزیر شیخ رشیداحمد، وزرا حکومت اور پی ٹی آئی کے رہنمائوں نے بھی خطاب کیا۔ اس موقع پرسابق وزیر امور کشمیر علی امین گنڈا پور،سابق وزیر صحت عامر محمود کیانی،آزادکشمیر کے وزرا حکومت،ممبران اسمبلی،تحریک انصاف کے ٹکٹ ہولڈرز،خواتین سمیت عوام کی بڑی تعداد جلسہ عام میں شریک ہوئی۔