دل بعض و حسد سے رنجور نہ کر
یہ نور خدا ہے اس سے بے نور نہ کر
نئی دہلی (کشیررپورٹ)پاکستان کے صوبہ سندھ سے مہاکمبھ میں شرکت کے لئے بھارت پہنچنے والے ہندو یاتریوں نے کہا ہے کہ صوبہ سندھ میں ہندوئوں کے ساتھ اتنا امتیازی سلوک نہیں ہے جیسا کہ میڈیا دکھاتا ہے،سندھ میں ایسا ماحول نہیں ہے کہ لوگ ہندوستانی شہریت کے لیے درخواست دیں۔ بھارتی میڈیا کے مطابق سوشل میڈیا پر مہاکمبھ کے تقدس کے بارے میں دیکھنے اور سننے کے بعد پاکستان کے صوبہ سندھ کے ہندو عقیدت مند خود کو یہاں آنے سے نہ روک سکے۔ جمعرات کو سندھ سے 68 ہندو عقیدت مندوں کا ایک جتھہ پریاگ راج پہنچا۔ سیکٹر-9 میں واقع سری گروکرشنی کیمپ میں میڈیا سے بات کرتے ہوئے، سندھ سے آئے ہوئے گوبند رام مکھیجا نے کہاجب سے ہم نے مہا کمبھ میلے کے بارے میں سنا ہے، تب سے ہماری خواہش تھی کہ ہم یہاں آئیں۔ ہم خود کو یہاں آنے سے نہیں روک سکے۔مکھیجا نے کہاپچھلے سال اپریل کے مہینے میں 250 لوگ پاکستان سے پریاگ راج آئے تھے اور گنگا میں ڈبکی لگائی تھی۔ اس بار سندھ کے چھ اضلاع گوٹکی، سکھر، خیرپور، شکارپور، کرج کوٹ اور جتابل سے 68 لوگ پریاگ راج پہنچے ہیں، جن میں سے تقریبا 50 لوگ پہلی بار مہاکمبھ میں آئے ہیں۔مکھیجا نے کہایہاں عجب نظارہ آ رہا ہے، بے حد خوشی ہو رہی ہے میرے پاس یہاں کے تجربے کو بیان کرنے کے لیے الفاظ نہیں ہیں۔ کل ہم گنگا میں ڈبکی لگائیں گے۔ یہاں آ کر ہم سناتن دھرم میں پیدا ہونے پر فخر محسوس کر رہے ہیں۔ صوبہ سندھ کے علاقے گوٹکی سے تعلق رکھنے والی گیارہویں جماعت کی طالبہ سوربھی نے بتایا کہ وہ پہلی بار بھارت آئی ہیں۔ انہوں نے کہا، یہاں پہلی بار ہمیں اپنے مذہب کو گہرائی سے دیکھنے اور جاننے کا موقع مل رہا ہے۔ یہ بہت اچھا لگ رہاہے۔