مظفر آباد۔5فروری (کشیر رپورٹ)وزیراعظم محمد شہباز شریف نے یوم یکجہتی کشمیر کے موقع پر اپنے کشمیری بھائیوں اور بہنوں کی اخلاقی، سفارتی اور سیاسی حمایت کا اعادہ کرتے ہوئے کہا ہے کہ حق خود ارادیت کے حصول کی جد وجہد میں اپنی جانوں کا نذرانہ پیش کرنے والے کشمیریوں کی قربانیاں رائیگاں نہیں جائیں گی، جموں و کشمیر کا تنازعہ پاکستان کی خارجہ پالیسی کا اہم ستون ہے اور رہے گا۔وزیر اعظم آفس کے پریس ونگ کی جانب سے جاری اعلامیے کے مطابق وزیراعظم محمد شہباز شریف نے ان خیالات کا اظہار ایک روزہ دورہ آزاد کشمیرکے موقع پرآل پارٹیز حریت کانفرنس کے رہنماں سے ملاقات کے دوران کیا ۔ وزیراعظم نے کہا کہ آج یوم یکجہتی کشمیر کے موقع پر ہم اپنے کشمیری بھائیوں اور بہنوں کی اخلاقی، سفارتی اور سیاسی حمایت کا اعادہ کرتے ہیں،حق خود ارادیت کے حصول کی جد وجہد میں اپنی جانوں کا نذرانہ پیش کرنے والے کشمیریوں کی قربانیاں رائیگاں نہیں جائیں گی۔انہو ں نے کہاکہ عالمی برادری کو مقبوضہ جموں و کشمیر میں بھارتی جارحیت اور انسانی حقوق کی خلاف ورزیوں کے خلاف اقدامات اٹھانے کی ضرورت ہے، جموں و کشمیر کا تنازعہ پاکستان کی خارجہ پالیسی کا اہم ستون ہے اور رہے گا۔وزیر اعظم نے کہا کہ پاکستان کشمیری عوام کے اقوام متحدہ کی سلامتی کونسل کی قراردادوں کے مطابق، حق خودارادیت کے حصول تک ان کی غیر متزلزل اخلاقی، سفارتی اور سیاسی حمایت جاری رکھے گا۔وزیراعظم نے وفاقی وزرا احسن اقبال اور انجینئر امیر مقام کو آزاد جموں و کشمیر میں مہاجرین کے مسائل اور خدشات حل کرنے کے لیے حکمت عملی تشکیل دینے کی ہدایت کی ۔
آل پارٹیز حریت کانفرنس کے رہنمائوں نے وزیر اعظم اور حکومت پاکستان کے جانب سے کشمیریوں کے ساتھ اظہار یکجہتی پر انہیں خراج تحسین پیش کرتے ہوئے ان کی کشمیر کی آزادی کی تحریک کی غیر متزلزل حمایت کو سراہا۔حریت رہنمائوں نے اقوام متحدہ کے پلیٹ فارم پر مسئلہ کشمیر بین الاقوامی برادری کے سامنے اجاگر کرنے پر بھی وزیراعظم کو خراج تحسین پیش کیا ۔ملاقات میں وزیراعظم آزاد جموں و کشمیر چوہدری انوار الحق، سپیکر آزاد جموں و کشمیر اسمبلی چوہدری لطیف اکبر، وفاقی وزرا احسن اقبال، رانا تنویر حسین، انجینئر امیر مقام، عطا اللہ تارڑ، کشمیری رہنما غلام نبی صفی، ایڈوکیٹ پرویز، اعجاز رحمانی، سید گلشن، محمد اشرف ڈار، شاہین اقبال، مشتاق احمد، خورشید احمد خان اور راجہ خادم حسین شاہین شریک تھے۔آزاد کشمیر کے سابق وزیر اعظم راجہ فاروق حیدر خان بھی اس موقع پہ موجود تھے۔
قبل ازیں یوم یکجہتی کشمیر کے موقع پر آزاد جموں کشمیر قانون ساز اسمبلی آمد پر وزیراعظم محمد شہبازشریف کا پرتپاک استقبال کیا گیا ۔بدھ کی صبح وزیراعظم محمد شہبازشریف جب آزاد کشمیر قانون ساز اسمبلی پہنچے تو آزاد کشمیر کے وزیراعظم چوہدری انوار الحق نے ان کا پرتپاک استقبال کیا ، انہیں گارڈ آف آنر بھی پیش کیا گیا ، پولیس کے چاق و چوبند دستے نے وزیراعظم کو سلامی پیش کی۔اس موقعے پر پاکستان اور آزاد کشمیر کے ترانے بھی بجائے گئے ۔
واپس کریں